Matriekuitslae 2018: Die patroon

Terwyl Minister van Basiese Onderwys Angie Motshekga groot gewag gemaak het van die “hoër” Matriekslaagsyfer van 78,2% vir staatskole vir 2018, wys onderwyskommentators daarop dat slegs 35% van die 1 141 731 leerlinge wat in 2007 met graad 1 begin het, in 2018 Matriek geslaag het. Dit meer as halveer die werklike Matriekslaagsyfer.

Aan die een kant beteken dit dat meer as 700 000 kinders nie by Matriek uitgekom het nie en dus waarskynlik nie geskool is vir die arbeidsmark en vir ʼn loopbaan van enige betekenis nie. In effek beteken dit dat hierdie getal jaarliks bygevoeg word tot die massa werkloses in SA en tot die gevalle wat hulle tot SASSA moet wend vir oorlewing – inderdaad ʼn maatskaplike tragedie.

Aan die ander kant moet gesoek word na wat is die oorsake vir hierdie hoë uitvalsyfer? Weereens wys onderwyskundiges daarop dat  die oorgrote meerderheid swart leerlinge in die land  deur die onderwysowerheid gedwing word om hul skoolonderrig in Engels te doen, m.a.w. ʼn tweede taal en nie hul moedertaal nie, wat waarskynlik van die inheemse tale is. Dit beteken dat gedwonge Engels en geen moedertaalonderrig die groot rede is vir die hoë uitvalsyfer.

ʼn Vraag nou is hoe beïnvloed hierdie toedrag van sake Christelike Afrikaanse Onderwys in die land? Wat kan en gaan gedoen word om te verseker dat Afrikaanse kinders en in besonder Afrikanerkinders hul skool onderrig in hul moedertaal Afrikaans ontvang en boonop binne hul tradisionele Christelike kultuur?

Wat sê lesers op hierdie vrae en ander relevante kwessies wat in hierdie blog geopper word?